Κυριάκο, Ανέστη πουλί μ', έμ’ αφ' σ' λελεύω τα ψέματα... είπεν η θεία η Στοφορίνα. Απ' εσέν ούλιε επερ'μένα και το θάνατος κ' επερ'μένα. Άμον ψέμαν έρτε με. Έτρεχα εκεί σην ΜαραΘώνος τα στράτας, εκεκά που εκάγαν 99 ψύα. Εδέβεν έναν ώραν και έφτασα εκεκά που έσαν μωρά, γυναίκ' μαυροφορεμένες και ο κόσμον τα κατσία τουν ξάι κ' εγέλαναν. Εξέγκα α σο τσαντάχ’ ντο είχα με τ' εμέν τη μηχανήν να εβγάλω ένα δύο φωτογραφίας τα καμένα τα δεντρά, τα ελαίας, τα πεύκα.... και τα στράτας.

Κρούει το τηλέφωνον που εκουβάλ΄να με τ’ εμέν, η λαλία τ' άμον κάπως εφάνθε με και αμάν είπα ατό για καλόν κ' επαίρεν! Λέει με τ' άσκημον το χαπάρ', ο Κυριέκον, ο γειτονάς εμουν, έφυεν... έφυεν το παλικάρ', εκόπαν τη ζωής ατ' τα κόρδας.

Ο Γιώργος (τεμοναεκ) Ζαχαριάδης, στη διάρκεια του εφετεινού Μαραθωνίου

Επέμναν ατώρα τα κόρδας τη κεμεντσές ατ' εκείνεν που έχτισεν με τα χρυσά τα χέρια τ' και εσέγκεν ατηνε σην πλατείαν τη χωρί, να τραγωδί και να χαρεντερίζ' μας και να κλαινίζ' μας.

Κυριάκο πουλί μ' ατόσα φρένα έχτισες, άμαν τη χάρονος τα φρένα έπρεπεν να εχάλανες ατα κ ' επόρεσες ρε πουλί μ' να εφτάς ατον έναν κασκαρίκαν. Αμον ατότες, που έσυρες το πιστόφ’ όπως είπε σε ο θείον ο Βέβαιας... για να μη πας εκεί, ση Σιαμανάντων. (σο θέατρον τη χωρί).

Ατώρα επήες σον Κύρτς τον Θεόκλητον, θα ελέπ' σε και θα αχπαράεται. Η μάνας η Αφροδίτη θα σύρ’ και τ' εσόν την καμονήν. Για την γαρή σ' την Κερεκήν ντο να λέγω και τα τρία παιδία σ' που εφέκες ατς κ' έφυες.

Εκές που πας τέρεν και χτίσον λύραν κοκίμελον, τραγωδ΄ και χαμογέλα, και με τα τοξαρέας σις, τον χάρον τέρ’ και γέλα. Ντο να λέγω σε άλλο ρε πουλί μ' ; Καλός γειτονάς έσ'νε, ετράνυνα με μαζί εκεκά σ' έναν πόρταν απάν κι ατώρα δέβα, δέβα σον κύρη σ' κεκά και σην γιάγια σ' τη Μάρθαν.

Εμείς αδακά θα ζούμε ολίγον κι άλλο, αν θέλ' ο Θεόν και θα έρχουμες σουμά σ'. Σον Μαραθώνιον που έτρεχα για τα ψύα τα άλλα, εγληγόρεσες κι έρθες κι εσύ, εθαρρείς και συνεννοημέν' έστουνε και ευρέθετε ούλ' μαζί εντάμαν.

Εγληγόρεσες κι έφυες Καλόν Παράδεισον Κυριάκο.

Η φωτογραφία είναι από το θεατρικό έργο «Ο Κλήδωνας» του Φίλωνα Κτενίδη, όπου παίζουν ο Γιώργος Ζαχαριάδης και ο Κυριάκος Καριπίδης