Θα λέω σας για τα μεσελόπα π’ έλεαν εμας όντες έμ’νες μικρά παιδία.

Εισπολλάτη [ευτυχώς] π’ έμ΄νες τσ̆εχέλ’κα και ‘κ’ επέραμ’ ατα ‘ς σα σοβαρά.

Ντο ανθρώπ’ θα εγίνουμ’νες; Ατό λέω και κανείς ‘κι ακούει με και ξαν ατά τα μεσέλα̤ λέγ’νε ‘ς σα τσ̆εχέλ’κα.

Ας πιάνουμε την "κοκκινοσκουφίτσαν".

Εισπολλάτη εγλύτωσεν το κορτσόπον ας ση λύκονος το στόμαν. Άμα κανείς ‘κ’ είπεν μας για την μάναν τηνάν είχ̆εν. Ατέ μάνα έτον, γιόξα παραμάνα;

Ποία μάνα θα έστελνεν μικρόν κορίτσ’ παιδίν, να πάει μαναχόν ατ’ απέσ’ ‘ς σο άγρο̤ν τ’ ορμάν’ με τα λυκούδα̤;

Εσείς καμίαν θα εποίνετε αΐκον δουλείαν; Τα τρία τα μουχτερόπα πα, νε μάνα νε κύρτς έτσ̆ιξεν ατα κ’ εφέκαν ατα μαναχά ‘τουν να χτίζ’νε οσπίτα̤. Μικρά μωρά, ντο οσπίτ’ να ‘φτάνε; Ε,ε,ε,ε ατό κανείς εσουν ενούνιξεν ατο;

Εφέκαν ατα τ’ άχαρα ‘ς ση λύκονος τα χ̆έρα̤ κ’ εδέβαν κ’ εχάθαν.

Έκ’σετε καμίαν και κανέναν να λένε για τον κύρ’ και την μάναν ατουν; Και ντο να λένε για αΐκ’ς χαΐνηδες γονέους;

Για τ’ ατό όντες θα λέτε μεσέλα̤ ‘ς σα παιδία και ‘ς σ’ εγγόνα̤ ‘σουν, τερέστεν και να έχ̆ετεν τον νουν εσουν ντο θα λέτε.

Το μεσέλ’ τερέστεν να έν’ καλόν μάθεμαν ‘ς σα παιδία .

Αέτσ’ μαναχόν θα ‘ινουνταν καλοί ανθρώπ’.

Γεώργιος Μ. Κωνσταντινίδης Καλαμαριά 2022

Λεξιλόγιο

γιόξα=μήπως, ή

εδέβαν=πήγαν [ρ.δεβαίνω]

Εισπολλάτη=ευτυχώς

ενούνιξεν-σκέφτηκε [ρ.νουνίζω]

έτσ̆ιξεν=λυπήθηκε[ρ.τσ̆ίζω]

μεσέλιν[το]=παραμύθι

μουχτερόπον[το]=γουρουνάκι

ορμάν’-ιν[το]=δάσος

τ̆σεχέλ’κα[το τσεχέλ’κον]=ανήλικα

χαΐνηδες[ο χαΐνης, η χαΐναινα]=σκληρούς

ωράστεν=προσέξτε [ρ.ωρά̤ζω]